Mass Readings
Liturgical Readings for : Sunday, 5th May, 2024Today's Readings
Readings in English
CÉAD LÉACHT
Sliocht as Leabhar Gníomhartha na nAspal 10:25-26. 34-35. 44-48
Doirteadh grásta an Spioraid Naoimh amach ar na ciníocha fasta.
Nuair a bhí Peadar ar tí dul isteach tháinig Coirnéilias ina airicis agus d’umhlaigh go talamh ag déanamh ómóis dó.
Thóg Peadar suas é áfach, á rá: “Éirigh i do sheasamh. Níl ionamsa ach fear ar do dhála féin.”
Ansin thosaigh Peadar ag labhairt: “Tuigim anois go fíor nach bhféachann Dia chun pearsan seachas a chéile ach cibé duine a thugann ómós dó agus a dhéanann an ceart, gur taitneamhach an duine sin dó is cuma cén cine ar díobh é.
Ní raibh an méid sin ráite ag Peadar nuair a tháinig an Spiorad Naomh anuas ar a raibh ag éisteacht lena theachtaireacht. Bhí alltacht ar na creidmhigh Ghiúdacha a bhí tagtha in éineacht le Peadar a fheiceáil gur doirteadh tabhartas an Spioraid Naoimh ar na págánaigh freisin, mar chuala siad ag caint iad i dteangacha agus ag móradh Dé.
Ansin labhair Peadar leo: “Cé a d’fhéadfadh uisce a mbaiste a dhiúltú do na daoine seo agus iad tar éis an Spiorad Naomh a fháil chomh maith linn féin?”
Agus d’ordaigh sé iad a bhaisteadh in ainm Íosa Críost. Ansin d’iarr siad air fanacht ina dteannta ar feadh roinnt laethanta.
Briathar an Tiarna Buíochas le Dia
Salm le Freagra Sm 97
Freagra D’fhoilsigh an Tiarna a shlánú do na náisiúin.
Malairt Freagra Alleluia!
I. Canaigí amhrán nua don Tiarna óir rinne sé éachtai.
Le neart a dheasláimhe is a chuisle naofa rug sé bua dó féin. Freagra
2. D’fhoilsigh an Tiarna a shlánú Nocht sé a fhíréantacht do na náisiúin.
Ba chuimhin leis a fhírinne is a ghrá do theaghlach Isráél. Freagra
3. Chonaic críocha uile na cruinne shlánú ár nDé.
Gairdígí sa Tiarna, a chríocha uile, agus nocht bhur n-áthas dó. Freagra
AN DARA LÉACHT
Sliocht as céad Litir Naomh Eoin 4:7-10
Is é Dia an Grá.
A clann ionúin, tugaimis grá dá chéile mar gur ó Dhia an grá agus an té a thugann grá is ó Dhia a rugadh é, agus aithníonn sé Dia. An té nach dtugann grá ní aithnid dó Dia, mar is é Dia an Grá. Mar seo a foilsíodh grá Dé inár measc gur sheol sé a aon Mhac sa saol le go mairimis-ne trídsean. Seo é an grá – ní gur thugamarna grá do Dhia ach gur thug seisean grá dúinne agus gur sheol uaidh a Mhac go mbeadh ina íobairt sásaimh ar ár bpeacaí.
Briathar an Tiarna Buíochas le Dia
Alleluia Véarsa Eo 14:23
Alleluia, Alleluia!
Má bhíonn grá ag duine dom, coinneoidh sé mo bhriathar,
agus beidh grá ag m’Athair dó, agus tiocfaimid chuige,’ a deir an Tiarna.
Alleluia!
SOISCÉAL
Go raibh an Tiarna libh. Agus le do spiorad féin
Sliocht as an Soiscéal naofa de réir Naomh Eoin 15:9-17 Glóir duit, a Thiarna.
Níl grá ag aon duine níos mó ná seo go dtabharfadh duine a anam ar son a chairde.
San am sin dúirt Íosa lena dheisceabail
‘Faoi mar a thug an tAthair grá domsa, thug mise grá daoibhse chomh maith.
Fanaigí i mo ghrá. Má choinníonn sibh m’aitheanta,
fanfaidh sibh i mo ghrá, faoi mar a choinnigh mise aitheanta m’Athar, agus a fhanaim ina ghrá.
Dúirt mé na nithe seo libh chun go mbeadh mo lúcháir-sé ionaibh agus go mbeadh bhur lúcháir-sé iomlán. Is í seo m’aithne: sibh a thabhairt grá dá chéile, faoi mar a thug mé grá daoibh.
Níl grá ag aon duine níos mó ná seo go dtabharfaidh duine a anam ar son a chairde. Sibhse mo chairde má dhéanann sibh na nithe a ordaím daoibh.
Ní seirbhísigh a thugaim oraibh feasta, mar ní eol do sheirbhíseach gnó a mháistir.
Ach thug mé cairde oraibh, óir gach a gcuala ó m’Athair, chuir mé in iúl daoibh é. Ní sibhse a rinne mise a thoghadh,
ach mise a rinne sibhse a thoghadh, agus a cheapadh chun go n-imeodh sibh agus toradh a thabhairt agus go mairfeadh bhur dtoradh; i dtreo, cibé ní a d’iarrfadh sibh ar an Athair i m’ainm,
go dtabharfadh sé daoibh é.
Is iad seo m’aitheanta daoibh:sibh a thabhairt grá dá chéile.’
Soiscéal an Tiarna. Moladh duit, a Chriost
************************************
Machtnamh ar Bhriathar Dé dia Séú Domhnach na Cásca
Ba thúisce é grá Dé dúinn
Deirtear go raibh saol fada ag Naomh Eoin, agus go ndeintí, agus é anonn go maith sna blianta, é d’iompar gach Domhnach isteach go Cathair Ephesas chun go ndéanfadh sé an Eocairist a cheiliúradh. Ar ndoigh h-iarrtaí air focal a rá leis an pobal beag a bhíodh bailithe, agus ba nós leis labhairt faoi ghrá Dé. I ndeire báire d’eirigh an pobal cráifeach seo bréan den téama céanna. Ní dhéanfadh an sean-fhear athrú ar bith ar a ábhar ach lean sé faoi ag labhairt faoin ngrá, toisc gurb é téama lárnach theachtaireacht Íosa é mórghrá Dé. “Creidimid i ngrá,” gur mana acu siúd a bhí i gcomhaontú iomlán le hEoin. B’éasca seo a bheith in a mana gan éifeacht go ndearna Eoin a mhíniú go soiléir cad a bhí i gceist aige leis an ngrá, agus déanfar é a léamh i léacht an Aifrinn inniu. “Seo é am grá ní gur thugamar gra do Dhia ach gur thug seisean grá dúinne agus gur chuir sé uaidh a Mhac go mdéanfaí íobairt sásaimh in ár bpeacaí.” Sé an fhírinne is doimhne maidir le Dia ná gurab é an Grá É. Tá sé d’réir nádúir do Dhia é féin a roinnt linn.
Pádraig Ó Rúairí, cp,
Sliabh Argus, Átha Cliath.
********************************************
AN BÍOBLA NAOFA
© An Sagart